城中鏡:李家傑遇地震 憑善心釋懷
恒基副主席李家傑舊年喺大阪遇上地震,以為自己死梗,佢胡思亂想,終於諗起自己過去捐咗過億元幫咗五千個內地兒童醫好先天性心臟病,先至釋懷。經過上次死過翻生嘅經歷,佢決定要再做多啲善事。
李家傑透露去年喺大阪遇地震,全靠諗起自己做過好多善事才釋懷。
舊年四月,李家傑喺大阪經歷地震,當時係夜晚,佢喺酒店嘅三十三樓,見到窗外嘅高樓大廈不斷搖晃。佢諗住今次死梗,第一時間當然諗起三個囝囝,但佢又諗,三個仔有個「咁猛」嘅阿爺,唔使擔心啦。佢又諗起自己只有四十九歲,成就仲比唔上好多人,所以覺得就咁死咗唔抵。直至佢靈光一閃,諗起自己過去五年透過內地嘅愛佑基金,捐咗過億元醫好內地五千個患有先天性心臟病嘅兒童,佢先至釋懷,唔再怕地震,仲瞓着咗添,第二朝起身,至知呢次地震係六點三級。
愛佑基金覆蓋香江
李家傑係佛教徒,但佢話事發時無唸佛經,直至諗起因為自己捐錢而可能改變五千個孩子嘅命運,至覺得安心,佢話如果真係死咗,呢五千個孩子都可能會喊。佢於是決定做多啲善事,成立愛佑(香港)慈善基金,自己做創會理事長,希望香港人慷慨解囊,可以好似佢咁開心。