城中鏡：陳稼晉分享機師夢
「衝上雲霄」係唔少年輕人嘅夢想，之不過飛機師嘅實際工作係點樣嘅呢？似乎唔係好多人知道，事關平日根本冇乜機會可以近距離接觸到。
陳稼晉（中）帶班學生參觀航空公司訓練基地，仲分享自己成為飛機師嘅經驗。（受訪者提供）
百仁基金轄下青少年培訓計劃「百仁之友」，日前就安排咗四間學校約四十名高中生參觀航空公司訓練基地。今次由曾經做過約十年高級機師嘅百仁基金副主席陳稼晉帶隊，先後走訪模擬駕駛艙、機艙同登機櫃位等地方，讓大家了解駕駛飛機實況同工作環境。陳稼晉除咗分享點樣實現成為飛機師嘅理想外，仲大談航空業嘅要求同挑戰，令有志加入航空業嘅青年了解更深。
