唔知大家有冇留意前首席大法官「楊官」楊鐵樑，喺平日間中都會攜帶拐杖外出，而每隔兩三年，佢手上拐杖嘅款式都會轉一轉，款式仲愈來愈靚同高貴，唔通拐杖都要講潮流嘅？

店員向楊鐵樑介紹唔同款式嘅拐杖。

楊鐵樑

以鎳雕刻成唔同動物造型嘅手柄，係呢個牌子嘅雨傘及拐杖特色。

楊鐵樑（左一）呢日有同行男士（左二）攙扶同一位女士（右）尾隨，並冇帶拐杖在身。

咁啱早前有日下晝約兩點鐘，就見到楊官喺一位男士攙扶同一位女士陪同下，到置地廣場一間男士服裝店The Armoury。見佢哋對放喺近店內門口附近一個英國品牌嘅雨傘Fox Umbrellas好有興趣，店員仲好快手拿出小冊子展示更多款式介紹畀佢哋添，但楊官似乎想買拐杖多啲。

話說呢個品牌嘅雨傘同拐杖好出名，其動物雕刻手柄仲係用一種叫「鎳」（Nickle）嘅銀白色金屬鑄造，耐用又唔會氧化，除咗有好多皇室貴族及名流愛用之外，喺六十年代英國電視劇《復仇者》中，仲因為主角經常手持一把而廣為識貨之人追捧。

或月底度身訂造

楊官平日唔單止行路腰骨挺直，衣着亦散發紳士風範，對拐杖款式講究自然非常合理。由七、八年前佢手揸類似皮革嘅黑色手柄拐杖，到後來嘅木柄及早前嘅鎳柄，每隔兩三年，就會見到佢手持一支新拐杖現身。計計吓，又差唔多係時候換一支新嘅喇！不過，當日楊官冇買到就離開。

聽店員講，原來呢個品牌嘅師傅會在本月底來港為客人度身訂造拐杖，只要預約時間，就可以自由配搭手柄同杖身，配搭出啱晒自己心水同長度嘅拐杖，唔知楊官係咪都買厭咗製成品，諗住月底再去自行配搭一支新拐杖呢？

第一手消息請下載on.cc東網iPhone/iPad/Android/Windows Phone Apps