政壇：搞搞政：沙田區選建制內鬥 建仔趕絕經民聯？
各大政黨正密鑼緊鼓為明年嘅區議會選舉部署，原來兩個建制政黨建仔同經民聯喺沙田三個選區中互相「廝殺」，各有前因後果，睇嚟大戰一觸即發！睇番沙田區議會三十六個直選議席，第一大勢力就係同公民力量合併咗嘅新民黨，共有十四個直選議員，建仔就有八個，經民聯只有兩個議席，包括碧湖同錦英，但建仔就想落去搶位，莫非想趕盡殺絕？
設計圖片
EQ出手WK拆招
碧湖選區現任區議員劉偉倫由○三年起當選至今，以前係白鴿黨黨員，之後退黨成為獨立泛民，呢屆就轉投經民聯。建仔上屆就派咗社區幹事黃冰芬對撼劉偉倫，只係輸一百三十幾票，據聞近年有人游說黃冰芬轉去附近有補選嘅選區落腳，但黃不為所動，堅持捲土重來爭奪碧湖選區議席，可能係想報一箭之仇。
喺錦英，湯寶珍亦係由○三年起當選至今，建仔立會議員EQ葛珮帆近期就搵咗個助理落區插旗，點解EQ要搶呢區？據聞係因為禾輋選區議員余倩雯係建仔一員，經民聯今年初就派咗社區幹事李德華頻頻落區，仲喺社交網站開咗個專頁宣傳，搞咁多嘢擺到明想參選，EQ睇見梗唔妥啦，故使「圍魏救趙」呢招。經民聯立法會議員WK盧偉國做過沙田委任區議員，唔知佢有乜計拆招呢？
至於EQ本人都唔係冇受到挑戰，佢嘅頌安選區近期就有工黨張超雄開設辦事處，坐輪椅嘅助理葉榮就掛晒橫額，睇嚟係想挑戰EQ。不過，葉榮近期因衝擊立會被捕，可能有手尾跟，隨時影響選情。
