每逢有大型靜坐集會，當警方要清場時，警員為咗令示威者無得反抗，都會使用所謂「壓點法」，一邊抬走一邊屈手、篤頸加捏臉等，唔少社運界人士領教過「壓點法」後都覺得好痛。警方為咗加強外界對「壓點法」嘅認識，上星期特別邀請一班監警會委員，去警察總部一嘗「被抬走」嘅感覺。
其實「壓點法」係國際普遍做法，唔少歐美國家警察對付示威者，採用最低武力時都會咁做。但由於「壓點法」真係好痛，被對付嘅人通常都會面容扭曲，如果警察用力過度，隨時對示威者造成傷害。所以監警會近期收到唔少投訴，指警方濫權使用「壓點法」。
試過後同情示威者
可能連警方都覺得有必要解釋，所以上星期就請咗一眾監警會委員去警察總部扮示威者，然後由警察向佢哋使用「壓點法」，聽講警方以為咁做可以釋除監警會委員嘅疑慮，但點知反而有反效果。據悉，雖然唔係個個監警會委員都被「抬走」，但聽聞試過「壓點法」嘅委員都叫苦連天。有委員仲話，事後有少少同情班示威者，因為真係估唔到咁痛喎。今次警方咪即係搵石頭揼自己腳？
第一手消息請下載on.cc東網
