政壇：唐唐話政改仲留有空間
話說全國人大常委會今日正式喺北京召開一連七日嘅會議，議程包括咗二○一七年嘅政改方案，相信人大常委會好快會為政改定下框架，預料提名委員會要過半數提名門檻，應該走唔甩，相信人大常委會公布後，都無乜討論空間。
之不過，全國政協常委、前政務司司長「唐唐」唐英年就唔同意喎，佢尋日話政改仲有好大空間，就算中央決定咗提委會人數及必須要四大界別，本地立法仲可以有好大空間決定提委會嘅組成。其實中央都話明國家安全至為重要，即係擺到明會「落閘」，有幾多空間，大家真係心中有數，如果唐唐咁都話仲有空間，唔怪得佢間九龍塘大宅挖到咁多空間嘞！
