政壇：議員驚青收乜嘢照申報

我哋近日翻查議員個人利益登記冊，發現多名議員都「有殺錯冇放過」，寧願多申報都唔好冇申報，其中議員陳恒鑌阿Ben仲連杧果同消腫膏都照申報，唔通佢嗜食生果，又成日運動撞傷？

陳恒鑌報埋杧果藥膏

阿Ben話上月九日百色市招商會送咗五十盒杧果畀佢，以每盒五十元計，即係合共二千五百元。百色市位於廣西，原來仲係「中國杧果之鄉」，相信阿Ben都大飽口福。之但係杧果始終屬熱性食物，食得多就會易上火兼濕熱，唔知佢會唔會分啲畀親友共享呢？

兩日之後，阿Ben又收到健康博士有限公司送嘅四盒消腫透骨膏，合共三百五十元，唔知係咪畀佢運動後使用呢？佢早前又去香港中山隆鎮同鄉會第二十八屆會董就職典禮做主禮嘉賓，收到嘅禮物就正常啲，就係價值一千元嘅金馬裝飾擺設。睇番申報，佢仲將三項物品影埋相，正面啲講就叫均真，負面啲就叫驚青囉。

我哋再睇下資訊及科技界嘅議員莫乃光嘅申報，佢話喺月初為IT界嘅會議致開幕辭，又參加咗專題討論，而主辦單位就送咗一個網絡媒體播放器畀佢，價值五百蚊喎。老實講，佢之前曾經申報國務院港澳辦主任王光亞送畀佢嘅基本法，當時申報價值二十二蚊人仔，今次申報嘅金額算係多咗嘞！

謝偉俊兩度執正資料

至於獨立議員Paul謝偉俊，我哋就發現佢今個月中，兩次更新股份資料，因乜解究？睇真啲，原來阿Paul嘅同事忙中有錯，中英文都搞錯咗。佢申報其中一間投資公司名稱時，將「天智」寫成「智天」，而兩間公司英文「Princess」同「Corporate」，就串錯成「Princes」同「Coporate」。阿Paul就話，立法會秘書處自公文袋湯家驊涉嫌漏報事件後，就好緊張其他議員申報，所以佢都要執番正囉。