廢官閂門唱爛歌 全城怒插周一鑊

話說平機會冇嗰樣整嗰樣，早前展開歧視條例「四合一」檢討諮詢，點知諮詢文件一見光就成為眾矢之的，畀全城鬧爆，連日來聲討周一鑊嘅浪潮此起彼落，各界質疑「魔鬼在細節中」，所謂檢討根本就係靠害。呢，連商界都睇唔過眼，九個中小企商會日前聯同政黨召開記者會，狂插周一鑊。有人不滿佢冇同中小企溝通，無事生非，一意孤行，「自己閂門唱首歌」，有人就質疑平機會權力過分擴張，有人直指佢冇資格做主席，遲早要執包袱。

嗱，呢啲咪叫唔衰攞嚟衰囉。例如將事實婚姻，即係兩個人無結婚但又好似夫婦生活嘅關係，納入歧視條例保障範圍咁，界線模糊不清，難以確定，根本就係搵嚟搞。有商會負責人質疑得啱，「個個都同居得，咁婚姻法要嚟做乜」。平機會變相鼓吹同性或異性同居，令僱主為僱員及其家屬提供嘅醫療等福利增加，經營更加困難，咁搞法擺明添煩添亂啫！

仲有吖，平機會又建議僱主除咗要控制僱員唔歧視，仲要規管顧客嘅行為喎。即係話，如果店員冇好好招呼同性戀顧客，或者店內有同性戀顧客嗌交但處理得唔好，亦可以被視作違例，隨時惹上官非，你話係咪靠害吖？唔怪得有人質疑周一鑊嚴重失信，擘大眼講大話，真係一啲都冇鬧錯。

天下本無事，廢官自擾之。平機會建議修訂四條歧視條例，對社會和諧毫無幫助，反而製造分化，撕裂族群，令社會更添煩亂。譬如建議修訂《種族歧視條例》，以「保護」內地旅客同新移民，根本就係多此一舉。係人都知，內地人同香港人同文同種，硬係將兩者區分開，將內地人當「外族」，平機會帶頭製造歧視，直頭係天大笑話喇。

所以話，國之將亡，必有妖孽。香港進入多事之秋，烏雲壓頂，山雨欲來，政治紛爭不斷，社會嚴重撕裂，周一鑊仲要無事生非，製造分化，簡直豈有此理。咪話太一叮踢爆，佢搞咁多嘢，無非想趁混亂博大霧，為自己撈取政治本錢，希望可以延任平機會主席啫。

香港人眼睛係雪亮嘅，周一鑊閂門唱爛歌，搞到四面楚歌，全城柴台，唔即時叮走佢已經偷笑，仲話想延任喎，簡直係癡心妄想。計太一叮話齋，如果佢仲知醜字點寫嘅，最好自己執包袱，無謂留喺度獻世，叮！