潮語「叉撚住」當然唔係一句粗口，雖然讀起上嚟，有啲江湖市井嘅味道。因為每當有人詛咒你嘅時候，好多人都會憤怒地回應一句：「我叉撚住你把口！」但係潮語「叉撚住」嗰隻「叉」並無太大攻擊性，只係口頭上嘅語氣表達。「叉撚住」其實係英文「CHALLENGE」嘅廣東話音譯，意思即係挑戰咁解。
大家一見到標題，唔好以為做乜事喺一份主流大報公然講粗口？係咪又想教壞細路？如果你係咁諗嘅話，我希望大家冷靜啲！我都係為人父母，有兩個仔，兼且喺社會打滾咗咁多年，當然知道咩地方、咩場合講咩說話。如果你話粗口有傷風化嘅話，其實打開電視新聞，見到啲高官政客嘅行為，例如係公然不負責任、摧毀承諾、不誠不信、有錯唔認……邊樣唔係教壞細路？種種事情相信比一句半句粗口更荼毒下一代吧？如果一句「叉撚住」就令你咁唔冷靜嘅話，我勸你可以學吓好似依家好多人咁，用冰水淋身，令自己可以冷靜一下，畢竟呢個世界實在可以用黃子華棟篤笑嘅一句宣傳口號去形容：「唔黐線唔正常！」
「叉撚住」喺外國文化上係好平常。因為西方講求人人平等，下級質疑上級，可以隨時「叉撚住」佢，唔似得中國人咁，做細嘅永遠要服從在上者，君君臣臣主子奴才。最近社會上好流行「叉撚住」，個個喺社交媒體你挑我、我挑你。事緣係美國有人發起為ALS籌款，希望喚醒人們對ALS（肌萎縮性脊髓側索硬化症）呢個遺傳病嘅關心。做法係搵一桶加咗冰嘅水照頭淋自己，然後拍低放上互聯網，之後再挑戰三位朋友做同樣嘅嘢，如果唔做就捐錢畀ALS相關嘅組織。好多世界頂級名人都響應號召參與呢個名為「ICE BUCKET CHALLENGE」嘅活動，其中包括facebook創辦人朱克伯格、微軟公司創辦人蓋茨、美國前總統布殊。一個星期，呢個活動就風行全球，連劉德華、金城武都玩淋冰，爭相「叉撚住」。點都好，希望呢個「冰桶叉撚住」，真係能夠幫到ALS嘅病人，唔好玩完就算！
第一手消息請下載on.cc東網廣告人、網台主持 阿東
