政壇：搞搞政：打造「新界維園」 梁福元吸金有法
生意離唔開創意！元朗十八鄉鄉事委員會主席梁福元經營大棠荔枝園多年，雖然早前荔枝園被揭霸佔官地十八年，但經拆卸違例建築後，梁福元即刻動作多多，仲發揮「小強」打不死精神，除咗將山莊易名大棠有機生態園，打正旗號做有機生態旅遊外，最近仲將全球四大雪節之一嘅哈爾濱冰雪節引入大棠。仲有，每年秋天唔少遊人會入大棠賞紅葉，佢就喺山莊種埋私伙紅葉樹、櫻花，一年四季都有主題吸引遊人，咁多吸水大法，真係睇到人眼花繚亂。
設計圖片及對白
荔枝園營運多年，都係騎吓馬、摘吓士多啤梨咁，今年梁福元就親自操刀，喺荔枝園主辦港版哈爾濱冰雪節，打造佔地約兩個半足球場咁大嘅嘉年華會。除咗大型戶外冰雪館，場內仲會展出逾百件冰雕展品，成為全港最大嘅室內冰雪館，料十月初正式開幕。此外，梁福元據講仲睇中近年大棠每逢秋冬季漫山紅葉，賞紅葉風潮熱爆全港，佢都喺個荔枝園種埋紅葉樹，唔單止咁，連日本傳統櫻花都種埋，假以時日，春逐櫻花、秋看紅葉，真係去元朗就咩都有得睇，使乜撲去日本、加拿大呢？
咁多吸客大計，梁福元先打通交通動脈，據了解，為咗接待逾百萬人次旅客，佢已經計劃加闊車路，方便個人遊同本地旅客坐車入園；而冰雪節結束之後，場地仍然可以舉辦其他節目，唔通佢想打造一個「新界維園」？
