政壇：何偉權牽頭助釋囚就業

商界助更生委員會執行主席何偉權（Ken）近日籌備緊釋囚招聘日，由於各行各業均出現人手荒，所以反應好熱烈，至今籌集的職位空缺多達六百五十個，薪酬由九千至五萬元不等。九月尾將舉行一場招聘會，讓僱主透過視像會議進行面試。

何偉權（中）牽頭，與郭棟強（左）及符策雄齊號召僱主聘用更生人士。

其中建築、飲食及零售業僱主反應最好，建築業承建商聯會副會長郭棟強就提供六十個空缺。佢慨嘆建造業人手嚴重短缺，只要更生人士肯搏，僱主唔會介意佢嘅過去。今次招工條件頗優厚，例如地盤雜工月薪一萬五千元，紮鐵或釘裝石屎板工人月薪可達四、五萬元。佢話釋囚都有出頭天，曾經有人發奮成為判頭。

中華廠商聯合會餐飲及服務業行業委員會主席符策雄亦幫手籌集一百五十份工，佢提供面試錦囊話，要放低包袱、要積極，唔好畏縮，希望更生人士把握機會重投職場，揭開人生新一頁。