政壇：陳健波掃成篋行山用品
立法會保險界議員陳健波趁暑假休會，同家人去瑞士行山，早前仲專登同太太去銅鑼灣時代廣場拍拖行街，仲喺一間運動服裝店舖睇行山用品，揀咗成個鐘頭後，兩人竟然拖住個篋、滿載而歸！
揀咗成個鐘頭，陳健波夫婦買咗成篋貨品離開。
佢哋一入間舖，就先睇啱咗對行山鞋，試鞋後，陳健波想要嘅橙色似乎冇晒貨，佢轉頭揀咗對黑黃色嘅鞋，之後就掃幾對厚襪，吸汗之餘仲可以減輕行山時腳部皮膚嘅摩擦！之後，佢又同太太拿起啲衫左拼右拼，仲入埋試身室，最後拖住成個篋出嚟，消費咁多，順手做埋間店舖嘅VIP添。老公試衫期間，陳太就同售貨員一路傾偈一路等。
陳健波話，計劃同兒子去瑞士聖莫里茲行山，嗰邊溫度比較低，所以要買定一堆禦寒登山衣物過去，但陳太就話怕辛苦唔去住，等老公同兒子探一次路睇吓咩情況先！
