違法必須追究 旅霸不容姑息

嗱，兩名本港導遊前日因為勸阻內地團友唔好亂拋煙頭同喺室內吸煙，分別受到襲擊，其中一位女導遊更加被一位昂藏六呎嘅男團友叉頸，幾乎窒息咁滯，搞到要報警及送醫院；另一位男導遊被對方推撞，上前勸阻嘅其他團友亦被追打，簡直七國咁亂，結果又係要報警處理。

惡人邊度都有，但惡得咁交關認真少見。國有國法，家有家規，亂拋煙頭同喺室內吸煙，莫講喺香港，就算喺內地城市都屬違例，導遊提醒旅客入鄉隨俗，遵紀守法，係為團友着想嘅啫，點知好心冇好報，幾乎連命都冇埋，旅霸橫蠻無理到咁嘅地步，令人嘆為觀止！

話時話，旅霸撒野無日無之，呢次已經係四日內第三單同類事件，問題嘅嚴重性可想而知。業內人士披露，內地團友襲擊導遊，幾乎個個禮拜都有，叉頸呢招周不時會出現，而導遊為咗保住飯碗，往往選擇啞忍，結果旅霸咪愈來愈肆無忌憚，愈來愈變本加厲囉。

太一叮想講嘅係，好客之道唔係姑息養奸，啞忍只會令呢班旅霸得寸進尺。近年呢類醜聞愈來愈多，中國人嘅劣根性，喺佢哋身上暴露無遺，甚至出醜出到去外國添。

早前有旅行團因部分團友被台灣拒簽，滯留本港，事件本來同香港無關，呢班旅客居然發爛渣，霸住旅遊巴唔走，仲揚言要包圍港府，甚至獅子開大口要求賠償十倍團費。

旅霸勢兇夾狼不特止，而且無恥加無賴添。有旅遊巴遲到一粒鐘啫，旅客就要求賠償三千元另加三晚酒店住宿，直情好似強盜咁。俗語話，盜亦有道，呢班旅霸完全唔講道理，問你服未！

仲有吖，前排有個內地團入住歐洲酒店，一聽講要收上網費，居然大鬧服務台，搞到酒店要報警求助，帶頭滋事者被逐出酒店，真係醜死怪，所有中國人嘅面都畀佢哋丟晒。

講開又講，近年中港矛盾不斷惡化，甚至出現「驅蝗」鬧劇，除咗因為政客煽風點火，內地旅客亦要自我反省，部分人嘅不文明舉止令人側目，郁下就無理取鬧，郁下飛擒大咬，你話唔討厭就假。

所以話，人必自侮而後人侮之，旅霸質素低劣，成個暴發戶咁款，以為有錢大晒，去到人哋嘅地方唔守規矩，唔講禮貌，係人都敬而遠之喇，叮！