城中鏡：龐愛蘭夜練二胡嚇親人
若果喺夜闌人靜時聽到哀怨淒美嘅二胡聲，其實都幾得人驚。沙田區議員Scarlett龐愛蘭今年十一月底將會同一班傑出青年為籌款晚宴表演，但佢自認從未掂過樂器，加上依家一星期先至上一次堂，所以要勤加練習，最近就經常在夜深時分喺屋企練習拉二胡。
為咗慈善籌款，龐愛蘭近期急練拉二胡。（受訪者提供）
不過，夜闌人靜拉唔成調子嘅二胡，都幾騷擾鄰居，尤其係喺農曆七月鬼節，二胡聲零舍令人毛骨悚然。所以Scarlett特登買咗個弱音器，盡量將擾人聲浪收細。
組搞笑版十二樂坊
究竟乜嘢籌款晚宴令到唔識樂器嘅Scarlett要臨陣磨槍呢？佢笑笑口話，香港防癌會同傑青慈善基金遲啲將舉辦籌款晚宴，仲特別成立咗一支樂隊叫做傑青十二樂坊，成員包括前香港劍擊冠軍何嘉麗等十二位男女傑青，Scarlett係成員兼團長，大家齊齊拉二胡。樂隊個名稱同十二位索女組成的樂坊咁相似，所以一眾傑青亦會學佢哋喺台上彈琴嘅姿態，擺明係搞笑版啦！
