城中鏡：湯漢斯懷舊 推打字機App
湯漢斯唔單止係金像影帝，原來仲係個創意爆燈嘅應用程式（app）設計師！話說對懷舊打字機情有獨鍾、一九七八年起開始收藏打字機嘅湯漢斯，最近搵人合作出咗個叫「湯記打字機」（Hanx Writer）嘅iPad app，志在同公眾分享用老牌打字機嘅感覺，推出個幾星期已經成為iTunes最多人下載嘅app。
湯漢斯對懷舊打字機情有獨鍾，最近仲推出iPad app同公眾分享用老牌打字機嘅感覺。（資料圖片）
用戶打開「湯記」，就會見到部壓扁咗咁嘅打字機，打字會聽到舊式打字機嘅「o得o得」、「叮叮」聲，以及需要換行時嘅提示。而「湯記」亦有與時並進，用戶打錯字撳番個以前冇嘅「delete」掣就OK，又可save低份文件隨時打印。
「湯記」個app本身免費，但如果各位想set個心水打字聲，或者轉字形、顏色或風格，就要選購其餘三款「湯記」，盛惠2.99至4.99美元，但見到連小學二年班就用Mac機嘅後生仔都大讚，湯漢斯唔憂個app冇人買啦。
其實依家喺歐美搞app競爭好大，所以愈嚟愈多開發商打算靠名人發圍，「湯記」就係一個成功例子。不過，加拿大小天王Justin Bieber投資嘅自拍app「Shots」就頹得好快，唔知係咪同佢形象麻麻有關呢？
