城中鏡：冰淋政商界 名人齊「找數」
冰桶挑戰（Ice Bucket Challenge）上月起喺美國瘋傳，以兜頭淋冰水拍下短片為證，再點名挑戰其他人，若二十四小時內不接受挑戰，便須向美國肌萎縮性脊髓側索硬化症協會（ALS Association）捐款一百美元，亦有人同時接受挑戰又捐錢，而呢項挑戰亦蔓延到本港政商界同學界。
梁敬國（左起）、盛智文、蘇錦樑、賈沛年同陳百里齊齊淋冰水應戰。
沈祖堯喺中大校園內「找數」自淋冰水，希望喚起社會關注並會向ALS捐款。（互聯網圖片）
莫乃光（左）同梁繼昌大桶冰水照頭淋。
陳志全選擇盤坐淋冰水。（互聯網圖片）
前晚被點中後宣布應戰嘅商務及經濟發展局局長Greg蘇錦樑，尋日仲帶埋副局長梁敬國、政治助理陳百里、投資推廣署署長賈沛年同海洋公園前主席盛智文一行五人齊齊喺添馬公園「找數」。阿Greg話多謝香港電視王維基點佢名，仲拎起包冰話贈王維基「冰釋前嫌」四個字，希望大家多啲溝通喎。佢之後點咗名向藝人黎明等下戰書，但黎明隨即回應話唔會淋冰，但會捐一萬元畀ALS。
立法會議員方面，除有「慢必」陳志全之外，莫乃光同梁繼昌亦一齊應戰。梁繼昌話關注到國際上嘅武裝衝突事件，所以佢除支持香港肌健協會及ALS外，仲會捐一百美元畀國際特赦組織同聯合國兒童基金會。
沈祖堯向三學生挑機
就連中文大學校長沈祖堯尋日都喺校園內「找數」，喺一班中大職員同學生見證下自淋冰水，並會向ALS捐款。淋冰水後嘅沈校長則向現任中大學生會會長張秀賢、前會長鍾耀華同楊政賢下戰書，更承諾若三位同學都能接受挑戰，便會為每位捐出一百美元予高錕慈善基金幫助腦退化症病患者。
特首梁振英亦有被點中，但佢就回覆只會以捐款方式支持活動，向ALS捐出一百美元及香港肌健協會捐出一萬港元。水務署則表示支持公益活動，認為可以在短時間內吸引大量參加者並籌得大筆捐款給有需要人士，加上大部分人使用較細小水桶進行，相信冰塊及水都用得其所。
