三年前臨近區議會選舉，九龍西多區大廈被揭發種票事件，例如美孚新邨一單位出現「一屋七姓十三票」嘅奇怪現象、黃埔花園出現天台單位種票、京士柏選區出現連環種票疑雲等。而喺之後嘅立法會選舉中，位於北角同西營盤唔少大廈單位又被傳媒揭發有種票情況。

設計圖片及對白

選舉事務處其後多次聯同執法機構打擊種票行為，總選舉事務主任李柏康多次揚言當局會加強抽查可疑個案，最近仲表明會將成份選民登記冊擺上網畀公眾查閱，以收阻嚇作用。之不過，早幾個月東區區議會南豐選區補選，白鴿黨趙家賢都曾向選舉主任投訴，話區內出現八十幾宗懷疑種票個案，但選舉事務處經檢視後，都係搵唔出有種票迹象。

有地區中人估計，選舉事務處近期之所以搵唔到有大規模種票例子，係因為相關人士今次種票時非常小心，盡量避免將唔同姓氏嘅人士放埋同一間屋內，反而將相同嘅姓氏擺埋一齊，避免出現「一屋多姓」嘅情況，惹選舉事務處懷疑。

此外，佢哋更加改變過往周圍種票嘅做法，改為喺舊樓或以劏房戶聞名嘅大廈種票，就算被揭發該大廈有種票情況，涉事人士都可以用「已經搬走咗」等理由蒙混過關，加上劏房租戶成日轉租客，選舉事務處就算想查都無從入手，唔使擔心會犯法。

呢啲就叫做你有張良計、我有過牆梯，選管會主席馮驊真係要度橋杜絕呢啲情況，如果選舉事務處唔再認真抽查，畀人偷雞種到票，選舉又點會公平公正呢？

第一手消息請下載on.cc東網iPhone/iPad/Android/Windows Phone Apps