政壇：市民難上車鬧爆鬍鬚曾
財爺鬍鬚曾喺過去一段長時間，除咗話美國就快加息，叫市民「上車」買樓小心風險外，又話連同外國經濟同政局不穩、本地嘅政改爭拗等，隨時會引發一場「完美風暴」，吹冧香港經濟、股市同樓市。
淨係識做「鍵盤戰士」
如果過去有相信鬍鬚曾「狼來了」嘅市民就真係中晒招嘞，事關樓價不斷攀升，喺政府推行嘅樓市辣招下，更加夾到啲細價樓爆升，令到原本諗住儲夠錢「上車」嘅市民都望門興嘆。
奇就奇在，鬍鬚曾除咗做「鍵盤戰士」，即係寫網誌喊驚之外乜都冇做過，但尋日一項民調竟然顯示佢嘅評分上升添，莫非市民真係以為官員唔做就會唔錯？
