政壇：陳家珮圍吳哥窟跑馬拉松
政界人物成日話忙於開會，應酬又多，想擠啲時間出嚟做運動都冇，但其實分配時間好講個人紀律，有心一定做到。好似做咗南區區議員無耐嘅新民黨Judy陳家珮，一向係長跑發燒友，原來佢鍾意去唔同國家跑馬拉松，早前就飛咗去柬埔寨吳哥窟，以長跑方式感受當地風土人情。
陳家珮話一路跑一路望住吳哥窟風景，跑得特別興奮。（受訪者提供）
一年最少跑一個地方
Judy話家族有個傳統，就係一年最少去一個地方跑馬拉松，但最初只係爸爸跑，佢同媽咪只企喺旁邊做啦啦隊，但久而久之發覺太悶，佢就加入跑埋一份，點知一跑不可收拾，愛上長跑呢項運動。依家每年都全家人拉大隊飛去唔同國家參加馬拉松。
早前佢哋成家去咗柬埔寨，條賽道仲要圍繞住吳哥窟，簡直係將運動同歷史結為一體。不過，佢話返港後都仲要加操，因為佢年底仲要參加一個沙灘長跑賽，相信到時所需體力唔少，依家已加入咗南區長跑會，積極備戰喎。
