政壇：雷士照明內訌 累慘小股東
雷士照明管理層內訌，董事長王冬雷為咗將雷士「去吳化」做得更徹底，繼罷免吳長江嘅首席執行官職務後，尋日將行動升級，宣布將公司總部搬埋去廣東惠州，遠離吳長江喺重慶嘅根據地，睇嚟呢場內訌大戲真係有排做。
王冬雷（左）昔日同吳長江齊出席周年大會，依家內訌唔知點收科？（資料圖片）
吳長江畀王冬雷罷免，條氣梗係唔順啦，拒絕讓位之餘，之前坐鎮喺重慶開記者會，同身喺北京嘅王冬雷隔空駁火，罵戰相當燦爛。雷士份公告就話，吳長江唔肯服從董事會嘅決定，又話佢嘅行動已經影響公司營運，今次決定暫停重慶公司嘅運作，仲改由惠州公司做臨時總部，好明顯係想削除吳長江嘅根據地，等佢再無作為啦！
罷免吳長江之後，雷士成立咗緊急事務處理委員會，由王冬雷同另外兩名董事揸旗。王冬雷今次出到呢招，唔知吳長江會點應對呢？話唔埋佢唔承認雷士總部搬竇，總之你有你話搬竇，我有我繼續喺重慶指手畫腳，公司停緊牌仲要咁搞法，小股東真係喊咁口囉！
