政壇：非洲爆疫嚇窒政界中人
自從西非國家畿內亞、利比里亞同塞拉利昂爆發伊波拉疫症之後，港府只喺機場向來自呢三個國家嘅旅客派發宣傳單張，但就未有好似其他國家咁禁止該國旅客入境。面對伊波拉疫症至今未有受控嘅迹象，真係嚇怕唔少政界人士，搞到佢哋唔知去唔去非洲旅行好，因為伊波拉病毒極易致命，如果一個唔好彩中招，分分鐘變最後一次旅行。
設計圖片及對白
立法會議員EQ葛珮帆早前應聯合國一個國際動物組織邀請，原定喺九月初去肯尼亞視察非洲象同犀牛被濫殺嘅情況，但係隨住疫情不斷擴散，肯尼亞已經成為傳入伊波拉疫症最危險嘅東非國家之一，事關唔少西非國家旅客如果要出發去亞洲等地，就需要喺肯尼亞轉機，所以如果有感染伊波拉病毒嘅西非旅客搭飛機前往其他國家，疫症分分鐘會擴散去肯尼亞。
雖然EQ到依家仲未知去唔去得成肯尼亞，但立法會秘書長Kenneth陳維安依然唔怕死，上星期已經率先去咗肯尼亞同納米比亞旅行，仲近距離接觸野生動物。佢透露，當初爸爸聽到佢話要去非洲旅行都非常擔心，佢就不斷解釋，話自己同家人會先去東非肯尼亞睇動物大遷徙，再去南非納米比亞欣賞沙漠景致，全程遠離所有西非國家，所以唔驚會感染到伊波拉病毒。
沙漠極速沖四分鐘涼
講起世界知名嘅動物大遷徙，Kenneth話見到一大群牛羚集體過河，非常壯觀。不過，由於佢入住嘅帳幕酒店設備比較落後，每晚沖涼前要先預約，等工作人員將水注入浴室嘅儲水器後，先至可以沖涼。加上沙漠地方水源稀少，每次只可以沖四分鐘涼，之後就會自動無水，如果成身都係泡泡先發現無水出，咁就唔知點算嘞！
