雷射廣告勁擾民 官僚坐視光污染
香港夜景多姿多采，遠近馳名，唔係浪得虛名o架，淨係每晚喺維港上演嘅幻彩詠香江已經令旅客拍爛手掌。不過咁，如果將幻彩詠香江搬去街頭上演，每晚不停用雷射強光射住你，咁就唔係姿彩，而係滋擾嘞。
係人都知，香港唔止有空氣污染，仲有光污染。尤其係旅遊及商業區，大大個廣告燈箱徹夜長開，搞到居民冇覺好瞓。咁都未算吖，近年商戶又發明一種新招數，以雷射燈光賣廣告，更加令人不勝其煩。呢，旺角煙廠街一間樓上咖啡室，數月前開始喺大廈二樓外牆裝上雷射燈，入夜後就以一組藍色雷射燈光投射到路面，同埋一組紅色雷射燈光將食肆名稱投射到行人路。
咪以為咁做冇問題，事關雷射燈光線強勁，可以射到幾條街外，加上咖啡室不停將雷射燈搖晃，唔止搞到行人眼花繚亂，仲影響司機駕駛，隨時造成交通意外。唔怪得喺附近經營排檔生意嘅檔主叫苦連天，指強光入侵排檔後，搞到皮膚不適，「拮拮吓咁」，而且強光令到條街變得更熱，幾乎連生意都做唔到咁話。
即係咁，做生意梗係希望吸引多啲客人，賣廣告本來無可厚非，但如果對其他人造成滋擾，甚至危及交通安全，咁就唔同講法嘞。正如區議員話齋，數月來已接獲大量居民投訴，向環保署反映後，咖啡室一度收斂，但冇幾耐又故態復萌，唔通真係無王管嘅咩？
冇錯嘞，雷射燈真係無王管o架。由於當局遲遲唔肯就光污染立法，加上雷射燈毋須喺大廈外牆加設廣告燈箱，唔需要向屋宇署申請，亦毋須得到大廈立案法團同意，結果咪搞到七國咁亂囉。就算雷射燈光射向公眾地方，路政署、地政總署、食環署亦闊佬懶理，而環保署最多亦只能作出勸喻，商戶睬佢都傻。
唔係講笑，光污染問題可大可小，特別係雷射光光線強勁，分分鐘令人視力永久受損。呢，俄羅斯就有呢類例子，一場喺莫斯科郊外舉行嘅舞會，本來應該射向天空嘅雷射光忽然射向人群，結果令三十幾人中招，視網膜受傷，好多人仲盲咗添。港府年前曾裝模作樣就光污染問題進行諮詢，點知最後以社會未有共識為由，拒絕立法，只要求業界自律喎，你話係咪搞笑吖。
更離譜嘅係，港大研究發現，原來本港光害主要源頭唔係商業機構，而係政府設施，淨係尖沙咀太空館，夜間光度竟然比國際標準高逾一千倍，成為全港光害之最。所以話，港產官僚其身不正，帶頭破壞環保，光污染問題又點可能解決吖，叮！
