城中鏡：CEO與青年同歡 梁卓偉玩對唱
我哋早前預告咗「歌手一號」歌唱比賽如箭在弦，呢個活動除咗聚集一班熱愛音樂嘅青年外，仲搵嚟一班同樣愛唱歌嘅CEO，與入圍決賽嘅參賽者配成組合進行對唱。日前佢哋齊齊去Band房練習交流一番，音樂底子深厚嘅香港大學醫學院院長梁卓偉（Gabriel）都有現身，仲一展歌喉，與男性參賽者首次對唱就非常合拍，聽到大家好陶醉。
梁卓偉（右）與隊友Walter盡情對唱，令在場的朋友聽得好陶醉。
李惠雄話遲啲會作首情歌冧老婆。
彭徐美雲（左）話平日都有同老公在家中唱歌，相信同隊友（右）對唱無難度。
今次參與對唱嘅嘉賓之中，好多都對音樂充滿熱誠，而各組合亦經過悉心配對，所以樣貌會有幾分相似，Gabriel同隊友Walter揀歌時就話，佢唱開啲藝術歌曲嘅作曲家都已過身二百幾年，而對上一次唱K亦耐到唔記得幾時喇，所以揀歌都係交畀隊友決定。不過，Gabriel咁有音樂天分，又係指揮，唱咩歌都難唔倒佢啦，最後佢哋揀哥哥嘅名曲《追》。
李惠雄想作情歌冧老婆
面對鍾情音樂但大學選擇修讀經濟及金融嘅隊友Walter，Gabriel就以過來人身份分享經驗，佢話有時興趣唔一定要變成正職，好似佢咁多年來從未放棄音樂，公餘時間帶學生巡迴演出一樣享受喎。
同場仲有李錦記掌舵人李惠雄（David），原來佢跟過三個歌唱老師學唱歌，佢話今次同年輕人對唱係個挑戰，但另一方面又畀到佢新嘅啟發。好似佢見隊友平日作曲作得咁高興，加上佢特別鍾意唱情歌，所以諗住遲吓都寫番一首情歌冧老婆，仲話如果勝出可以免費錄碟添，所以會更加努力。
至於卸任女童軍總監不久嘅彭徐美雲亦同老公彭曉明一齊支持比賽。彭太話屋企有個琴，所以每星期都會同老公一齊唱歌當係家庭樂，老公就講笑話掛住對唱所以少咗嗌交喎！
