政改到咗關鍵時刻,基本法委員會主任李飛等京官周四就會南下深圳,泛民議員都會北上會面,不過,喺立法會手握六票嘅民主黨(白鴿黨)就顯得好驚青,尋晚忽然搞個佔中工作坊,由乳鴿區諾軒同林卓廷湊數示範吓如何佔中,據悉,該黨曾經有人提議學古人咁以血為盟,以示對佔領中環行動(佔中)嘅忠誠,但有老鴿嫌出到血,又血腥兼唔衞生,先避過呢場血的戲碼咋。

設計圖片及對白

不斷釋出善意

自從一○年同中聯辦密室秘談,被人指摘投共足足四年,白鴿黨至今都猶有餘悸,北上前都不忘扮激進。不過,政圈仍對白鴿黨有望轉軚認為有迹可尋,好似佢哋由開初堅持公民提名,到後來三軌提名甚至近日再改口,降價要求特首普選「冇不合理限制」,都反映該黨不斷釋出善意。而老鴿李華明早前另組「政改民意關注組」力撐「袋住先」,開闢溫和泛民主派戰線,另一老鴿吳永輝亦簽署由建制派牽頭嘅聯署聲明,呼籲各界尋求共識,可見該黨在政改議題上絕對有偈傾。

不過,有人唱白面,當然都要有人唱黑面,林卓廷佢哋尋晚預演佔中,就係一個力爭嘅動作,點都好,白鴿究竟係做場騷,強調未被統戰,定係將來一個華麗轉身,睇落去好快知。

第一手消息請下載on.cc東網iPhone/iPad/Android/Windows Phone Apps