政壇：陳恒鑌淋冰水挑戰阿人
為咗幫「肌肉萎縮性脊髓側索硬化症」籌款，由美國hit到香港嘅「淋冰桶挑戰」，最近有唔少政界人士加入。尋日就輪到立法會議員陳恒鑌（Ben）將成桶冰水照頭淋，仲指名挑戰三位政界人士，包括黨友何俊賢、佔中三子之一嘅戴耀廷、將政治捐款「袋住先」嘅工黨李卓人，唔知呢三位人士能否二十四小時內接受挑戰呢？
陳恒鑌一桶冰水照頭淋，向戴耀廷同李卓人挑機。（互聯網圖片）
高佬賢昨晚隨即應戰。（互聯網圖片）
由於挑戰者可要求被挑戰者向邊間機構捐錢，阿Ben就先叫何俊賢捐錢畀中國紅十字會，幫助雲南地震災民，唔捐就要淋冰。至於第二位被挑戰嘅戴耀廷，阿Ben就話佢叫嘅細路參加佔中犯法，真係要用冰水淋身諗清楚至好做喎。不過，戴耀廷由頭到尾講明佔中要十八歲以上至參加得，佢似乎有少少抽錯冰囉。
好喇，第三位受挑戰人士就係阿人，阿Ben諷刺佢收咗壹傳媒老闆肥佬黎政治捐款，應該淋一淋身諗吓仲有無「袋住先」喎。淋冰挑戰無論在美國或香港，目的都係為慈善機構籌款，唔知阿Ben係咪想何俊賢捐錢捐埋戴耀廷同阿人嗰份呢？
阿Ben撩起戰事，同屬黨友嘅高佬賢梗係二話不說就應戰，幾個鐘之後已經履約，高佬賢喺佢嘅社交網站上載一張相，證明佢已經完成淋冰桶嘅挑戰，但佢話，淋咗冰水都照捐錢，高佬賢仲將戰火燒向同屬建仔嘅陳克勤，挑戰克勤仔敢唔敢。就咁睇，佢哋呢個淋冰桶骨牌有排喺立法會、甚至政圈流傳。
