政壇：領匯踩入大元食肆難捱
領匯搞商場等於租金搏命加，呢個方程式已經應驗喺多個地區及商場，而十二間位於大元邨美食廣場嘅餐廳租約將屆滿，領匯亦計劃優化廣場，翻新一番，暫時只得三間食肆願意翻新後續租，其他嘅就諗緊，多名大埔區議員尋日同領匯代表會晤，商討大元邨食肆租約事宜，區議員區鎮樺擔心食肆翻新後，租金上升，最終轉嫁消費者，居民變相要捱貴價食物，要求領匯交代租金升幅。
大元邨美食廣場部分食肆掛上反對翻新計劃橫額。
不過，領匯方面表示，升幅需與租戶協商，而食品售價由店主因應市場定價。另一方面，無論啲食肆係咪決定續約，交舖前均需自資還原店舖，唔續約者如擬提早離場，更需繳付百分之三租金或五百元行政費，以價高者為準，呢個要求亦引來批評，有區議員炮轟徵收離場費及要求還原店舖唔合理，估計還原費用動輒十萬元，令小商戶百上加斤。領匯代表就透露，正研究提供部分資助，資助準則及金額最快下周初有答案。
