政壇：碧桂園三巨頭都叫阿斌
華人企業常見家族化現象，以內地房地產起家嘅碧桂園尋日公布人事變動，楊永潮辭任執董，楊嘅另一個身份係創辦人楊永強嘅姪兒，有分析員認為，雖然今次董事會係走咗個家族成員，不過依家裏面仲起碼有四個家族成員，即使今次動作後，都唔係好有「去家族化」嘅味道。至於今次人事變動對公司股價，估計應該不及今年三月伍綺琴唔做公司首席財務官（CFO）咁大。
領匯代表與多名大埔區議員商討大元邨美食廣場翻新事宜 。
該公司尋日喺公布業績之後宣告，於○六年十二月起出任碧桂園執董嘅楊永潮辭任，發展其他個人事務。楊永潮今年六月先由營銷中心總經理調任為董事局主席特別助理，不過當時執行董事職位就無變。睇番年報，三十九歲嘅楊永潮係透過太太，持有三百七十一萬股碧桂園股份，只佔發行股本百分之零點零二。舊年佢嘅薪金為一百九十萬元人民幣，連埋退休計劃嘅僱主供款，總薪酬一百九十五點四萬元。
碧桂園總裁莫斌回應再有人事變動時話，公司嘅銷售額由之前嘅四百幾億人仔，加到依家超過一千億，喺呢個高速發展環境下，一定會有管理嘅更新，管理提升可為長遠發展打下堅實嘅基礎。至於啱啱加入為CFO嘅吳建斌，莫斌話，吳喺資本市場同財務管理都係非常出色，相信對公司財務結構嘅改善有好大作用，至於舊年五月成為聯席總裁嘅朱榮斌，就希望佢可以收購更好嘅地皮，為長遠發展打下基礎。碧桂園三位要員都叫阿斌，又咁啱有中國海外背景，真係難得嘅巧合。
