將軍澳、屯門同打鼓嶺三個堆填區未來數年將陸續爆滿,垃圾圍城並唔係危言聳聽,嚟緊嘅十月,立法會復會後,政府就會即刻處理「三堆一爐」撥款申請,此仗可謂許勝不許敗,近日政圈都有風吹草動,據聞,環境局局長黃錦星已經意識到危機,開始着手亡羊補牢,近期急急約見建制派食飯補鑊,最終能否順利「拆彈」,十月自有分曉。

設計圖片及對白

頭炮約見工聯會

垃圾問題事關重大,但建制派對於決戰期臨近卻怨聲載道,其中一個不滿係,環境局內冇人同建制派打交道兼瞓身拉票,仲有人形容政府嘅態度好似「有事鍾無艷,無事夏迎春」。

我哋早前報道過,政圈發現黃錦星、副局長陸恭蕙及政治助理區詠芷三人有一大盲點,就係冇人識同建制派打交道同拉票,早前,呢個局先後「甩轆」,如發生終止待續及否決活化已復修堆填區計劃同小蠔灣廚餘回收中心,黃錦星對於連串「甩轆」似乎都知衰,開始變陣,最近,聽聞開始向建制派埋手,希望食飯拉票「補鑊」。

綜合各方消息指,黃錦星「補鑊」嘅頭炮係約見工聯會,除咗為「三堆一爐」拉票外,又主力解釋廚餘回收中心被指造價過高等課題;緊接係約會民建聯。據聞佢將會陸續食飯「拜票」,似乎想表達一票都不能少嘅訊息。

至於被視為建制反對派嘅自由黨,據聞黃錦星已經提出,要同該黨喺下個月食飯、溝通。

不過,雖然佢嘅連串飯局密集展開,但係講到底,要同建制派建立戰略合作夥伴關係,唔係一兩餐飯嘅事情,否則,次次出事先至拉票,都唔拉得幾多次,萬一再發生大單嘢「甩轆」,咁就真係隨時收工都似。

第一手消息請下載on.cc東網iPhone/iPad/Android/Windows Phone Apps