招聘明益自己友 消防醜聞何時休

話說消防處近日內部招募救護學校助理教官，要求各分區提名隊目同總隊目。由於助理教官喺編制上屬總隊目級，隊目會以署任嘅總隊目身份擔任助教，變相升職之餘，每月人工仲大幅增加四、五千蚊添，唔怪得趨之若鶩，吸引咁多人投考啦。本來呢，精挑細選揀出嚟嘅，應該係精英中嘅精英至係，點知其中一個「榜上有名」嘅隊目，居然只有四年幾資歷。咁就奇嘞，消防處內部通告列明嘅三項條件，首要條件正正係五年資歷，點解有人可以例外，明明唔合資格都雀屏中選呢？

原來，朝裏有人好辦事，今次又係益自己友嘅翻版。有前線人員踢爆，該名中選隊目曾經同救護學校一名高層駐守同一救護站，係對方嘅舊部屬，有人甚至透露直接以「內線」聯絡呢名高層，質疑事件涉及以權謀私、利益輸送，仲聲言會向其他執法機關舉報添。

最離譜嘅係，五年隊目資歷嘅規定係白紙黑字寫到明，點知消防處官字兩個口，話只係其中一個考慮因素喎。正所謂巧言令色鮮矣仁，處方解釋含糊不清，愈描愈黑，你話唔係官官相護，三歲細路都唔信喇。嗱，唔該保安局拿拿臨徹查事件，搞清楚當中究竟有乜黑幕或蠱惑，還市民一個交代。

講開又講，消防處益自己友，早有前科嘞。花園街四級大火後，消防處加開十六個巡查舊樓嘅職位，一反慣例冇將招聘廣告上載公務員事務局以及勞工處網站，只係靜靜雞喺消防處網站刊出告示就算數，有資深紀律部隊人員質疑，咁做明顯想側側膊為翻閹退休消防員鋪路，甚至可能一早就有內定人選，所謂招聘只係做吓樣。

正如有人話齋，世上沒有無緣無故的愛，也沒有無緣無故的恨。消防官僚親疏有別，梗係有人平時落足鞋油，日子有功喇。係人都知消防處擦鞋文化根深柢固，第樣唔講，淨係講每次新舊處長交接，例必搞場大龍鳳，又檢閱又演習，仲出動埋前線人員做布景板，排場分分鐘直逼國家領導人咁滯，問你服未！

所以話啫，消防處管理無方，擦鞋有術，難怪近年醜聞層出不窮喇，集體秘撈、當值時賭博、消防局內開P、毆打同袍……無奇不有，鑊鑊新鮮鑊鑊甘。都係嗰句，消防官僚不務正業，旨意佢哋救傷扶危，蚊都瞓蛇都死啦，叮！