城中鏡：劉嘉時籲青少要似海綿
見過BCT銀聯集團董事總經理及行政總裁劉嘉時嘅人，無一不讚嘆佢談吐得體、舉止優雅。謙虛嘅劉嘉時其實系出名門，父母家庭從商，九十幾歲嘅媽媽來自上海，喺南京女子中學畢業，爸爸就讀過上海Saint John's大學，兩間老牌名校出過無數商界政界名人。
劉嘉時勉勵青年人要好似一舊海綿咁，不停吸收新知識。（資料圖片）
嘉時當年一畢業就喺美國大行做MT（管理培訓生），身為唯一嚟自亞洲，仲要係女性嘅MT，不時受到唔公平對待，揀部門又只可以揀人哋唔要嘅信貸風險部門，日日留喺back office，不過今時唔同往日，依家最吃香嘅就係風險控制人才！佢勉勵年輕人，無論同乜嘢人合作、做咩崗位，幾時都要好似一舊海綿咁，不停吸收新知識，第時一定可受用。
