城中鏡：何倍倩上網買衫中晒毒
依家職業女性唔易做，同時要兼顧家庭同工作，唔單止時間上要配合到，平衡心態都好重要。城市女青年商會早前舉辦「全港時尚專業女性選舉」，而前日就公布得獎名單兼頒發獎項，包括恒生新抱Anina何倍倩、莎莎太子女郭詩慧同邱德根孫女邱詠筠，都獲頒為全港時尚專業女性，佢哋嘅女強人身份再被肯定。
何倍倩的女強人身份再獲肯定。
得獎的郭詩慧（右）與設計師何國鉦合照。
旗下品牌遭洽購
Anina集三位小朋友之母同職業女性於一身，點樣可以做到唔顧此失彼呢？佢話為咗節省時間，所以鍾意喺網上購買時裝同嬰兒用品，佢仲以「中毒」嚟形容自己添！佢話：「我懷孕嘅時候好少出街，靠電腦同外界聯繫，自己衫、bb衫，甚至尿片都係網購，真係好方便。」佢話有啲網站甚至可以訂購喺外國runway嘅服裝：「因為外國嘅runway係行早兩季，所以啲衫訂完要半年後先有貨，但好處係呢啲衫香港未必會入貨，可以減少同人撞衫嘅機會。」
身為網購粉絲嘅Anina睇中網購嘅潛力，透露旗下嘅護膚品牌最近也打入了國際著名嘅大型購物購站net-a-porter，佢話呢個網站要求好嚴格，同對方洽談半年先至成事。Anina嘅品牌喺美國發展不俗，仲有人願意出高價收購，令佢內心頗為掙扎，因為佢本身喜歡工作，唔捨得放棄，但另邊廂佢又要照顧三個小朋友，確實令佢體力透支喎！
