早前內蒙古來香港舉行招商活動,好多城中名人去撐場,包括港區全國人大代表Peter王敏剛、中華總商會永遠名譽會長Jonathan蔡冠深等,冇去過內蒙的華懋集團主席龔仁心亦同家姐龔中心一齊現身。眾人講起住蒙古包、大啖食肉飲酒的豪邁文化,都回味無窮。

王敏剛買入十幾隻公仔,開心到笑晒。

蔡冠深投資房地產遍及內蒙古。

龔仁心(右)雖然冇去過內蒙,但對內蒙的草原及羊隻印象深刻。左為龔中心。

王敏剛掃蒙古Look公仔

中文大學工程學院副院長黃錦輝話,佢曾隨資訊科技界好友去內蒙四、五次,亦曾試過同太太一齊去旅遊。去到內蒙梗要住蒙古包,但今時今日好多外形似蒙古包嘅酒店,其實係用石屎興建,黃錦輝就好好彩,曾住過環境簡陋嘅傳統蒙古包,體驗夠晒真實。一場嚟到,又點少得去當地著名連鎖火鍋店打邊爐,不過侍應一嚟到就問佢哋係咪一人要一斤肉,嚇咗佢哋一跳,蒙古人真係大啖食肉嘅民族。

轉頭見到Peter喺一個展銷攤位上買嘢,原來佢被穿上蒙古衫嘅公仔吸引,一口氣買下十幾隻。佢笑笑口話喺內地推動動漫文化,好似佢喺絲綢之路沿線投資唔少酒店,每間酒店都以反映當地獨特文化嘅公仔做吉祥物,所以當日買公仔純粹係想帶返去畀動漫部同事參考。講到起酒店,佢話曾計劃喺內蒙建傳統蒙古包酒店,即係蒙古包係放喺牛車上,可惜最後因為取得土地唔夠大而擱置。

同場嘅Jonathan喺內蒙都有生意,包括喺通遼市投資房地產,仲買埋當地市政府大樓添。市政府都買埋?佢笑稱,係市政府前大樓至啱。

第一手消息請下載on.cc東網iPhone/iPad/Android/Windows Phone Apps