政壇：搞搞政：激版政改廣告未出街先「河蟹」
近年嚟香港社會愈來愈撕裂，僵持只會搞到冇彎轉。除咗包括政制及內地事務局局長譚志源在內嘅政改三人組，要四出聽取各界有關政改嘅意見外，聽聞政府早排搵人製作政改宣傳片，共有五條唔同版本嘅廣告片畀政府揀，其中有一段係用激進嘅示威場面，配以節奏非常快速、緊張嘅音樂，最後再問觀眾一句：「真係冇彎轉？」有睇過條片嘅人認為幾好，話夠緊貼香港現狀，但係政府驚太激，最後都係揀咗依家大家睇到嘅溫和版嘞！
設計圖片及對白
傳含衝擊立會畫面
最近政府推出嘅政改廣告係「想變？二○一七有得普選，有票，真係唔要？」呢個廣告效果係點，見仁見智，但據聞喺廣告片未出街前，當局曾逐一邀請各派人士去睇幾個唔同版本，再收集大家嘅意見。呢五條廣告片當中，有啲比最終出街版本更溫和，但最令人印象深刻嘅係上述「冇彎轉」版。
據講，條片疑用咗早前反對新界東北發展人士衝擊立法會時，示威者用竹枝做衝擊工具嘅場面，睇過嘅人話條片較易讓人產生共鳴。不過，政府官員覺得始終係溫和啲好，所以最後都係被收埋。
