下屆區議會選舉明年舉行，各大政黨都開始滿腹大計，希望盡量擴大版圖加強勢力。尤其係一啲有專業背景嘅年輕人，特別受到政黨青睞。

聽聞王惠成對地區直選興致勃勃，考慮出戰明年區選。（資料圖片）

好似教育工作者聯會副主席王惠成咁，做咗幾年教聯會高層，喺教育界都有少少知名度，但係喺政壇唔算出名，最近佢就加入咗新民黨，唔通佢劍指教育界功能組別？聽聞教聯會最終派乜嘢人出選功能組別未有定案，反而王惠成好似對地區直選興致勃勃，仲積極考慮出戰明年嘅區選添！

本身係中學教師嘅王惠成祖籍福建，由細到大都住喺北角，如果明年區選成功喺港島東區取得席位，分分鐘可以一石二鳥，既幫新民黨箍實福建幫票源，又可以壯大教聯會喺地區嘅影響力，呢個如意算盤打唔打得響呢？

第一手消息請下載on.cc東網iPhone/iPad/Android/Windows Phone Apps