早前都講過有傳喺大學聯招放榜前夕，八大院校校長曾有聚餐，言談間提到學民思潮黃之鋒，有校長講笑話寧願出獎學金都要送黃之鋒去第二間讀咁話，但講就係咁講，黃之鋒早前自爆獲公開大學政治及公共行政學系收咗，將喺下月正式成為公大一分子，而巧合地公大尋日喺黃自爆入讀公大後首次舉行記招，據聞唔少問題都同黃之鋒有關。

黃之鋒

當問到黃之鋒一旦參與佔中，校方會否提供協助時，公大協理副校長葉耀強話尊重學生有言論自由，會鼓勵學生依法參與校外校內活動，一旦學生需支援，校方會幫助學生喎。

公大公共事務總監伍展明就苦口婆心話，黃之鋒係一個有個性嘅學生，希望佢喺學生活動發揮才能嘅同時，學術方面亦有發展。一句到尾，黃之鋒之後為政改為爭取落實公民提名會做乜，真係誰也說不準，睇怕公大要有心理準備見招拆招嘞！

第一手消息請下載on.cc東網iPhone/iPad/Android/Windows Phone Apps