政壇：朴槿惠見馬雲有大搞作

朴槿惠尋日喺青瓦台，即係南韓總統府，接見馬雲。據聞佢哋交換合作意見，包括中韓兩國嘅電子交易、遊戲、影視等領域。內地媒體仲話，喺會見過程中，兩位仲交流中韓兩國點樣提高電子交易系統同物流效率，仲有產品認證服務等領域，仲話為展開合作達成共識。朴槿惠仲想阿里為南韓中小企業進軍中國電子商務市場行個方便。

早喺上個月，馬雲都去過南韓一趟，有消息話，佢曾秘密赴韓同三星高層商討智能眼鏡合作。睇嚟佢早就睇中南韓市場，想喺南韓大展拳腳。

講起影視娛樂，阿里早前宣布，旗下數字娛樂事業群阿里數娛與海爾電視推出智能電視。新推出嘅智能電視，仲可以支援淘寶網購，真係八足咁多爪。