話說本報喺上月報道政府部門各自為政，遊客要前往沙頭角荔枝窩地質公園「關卡重重」，只能經迂迴山路步行兩小時，或經水路於沙頭角禁區包船前往，導致呢個世界級地質公園極少訪客。事有湊巧，發展局局長「波波」陳茂波早前現身沙頭角，同行仲有規劃署署長凌嘉勤，唔知波波係咪亡羊補牢，拉大隊微服出巡，諗吓補救辦法呢？

頭戴鴨舌帽的陳茂波拉大隊到沙頭角視察。

凌嘉勤（左一）作村民打扮隨行。

有沙頭角居民向記者報料，話波波上周六微服到訪沙頭角。當時波波頭戴鴨舌帽，身穿間條恤衫巡視沙頭角多個地點，見到有村民行過，仲舉起右手打招呼。同行的凌嘉勤一身打扮仲入戲，身穿有領T恤，揹住背囊，頸上仲掛住一條毛巾，打扮好有村民Feel。佢哋成班人打扮似足去行山，唔講仲以為係趁周末去戶外消遣的市民添！

第一手消息請下載on.cc東網iPhone/iPad/Android/Windows Phone Apps