政壇：AO歌王歎世界恨死高官

有「AO歌王」之稱嘅民政事務局前常任秘書長楊立門，正享受緊長達一年嘅退休前休假，認真恨死仲喺熱廚房捱世界嘅一班政府高官。楊立門話早排同班朋友去法國自駕遊，今次旅程最令佢感興趣嘅唔係時尚之都巴黎，而係聞名中外嘅法國南岸城市尼斯，仲話去到尼斯海灘，先真正明白乜嘢叫做「陽光與海灘」，置身其中，乜嘢都唔使做已經完全放鬆晒。喺呢種輕鬆嘅心情影響下，一向官仔骨骨嘅佢去到尼斯海灘即刻換番件格仔衫，戴上黑超，以免與當地氣氛格格不入。