政壇：民主阿婆滿口歪理教壞人
政治光環冇晒嘅「民主阿婆」前政務司司長陳方安生，正一有口話人、冇口話自己！同壹傳媒集團主席黎智英（肥佬黎）等組成「搞事四人幫」嘅民主阿婆早前被踢爆過去兩年收受肥佬黎捐款多達三百五十萬元，仲幫肥佬黎去信銀行機構，要求銀行解釋抽廣告原因，但佢一直就以「唔透露捐款人姓名」、係「無條件接受捐款」等模糊策略拒絕交代真相。
設計圖片及對白
之不過，對於前日反佔中大遊行有人收錢遊行，佢就叻唔切又譴責又反對，仲話咁做係侮辱香港市民嘅智慧，根本就係滿口歪理，雙重標準兼且教壞人。
被問經費來源發爛渣
尋日民主阿婆喺佢做召集人嘅「香港2020」記者會上批評，前日嘅「八．一七和平普選大遊行」中有人懷疑收錢遊行，佢話︰「係咪應該畀市民有真正嘅選擇呢？而唔係透過畀錢啦，安排好多其他應酬節目，先可以游說市民上街表態呢？」仲話佢自己對呢樣嘢非常反對，覺得係侮辱咗香港人嘅智慧。
民主阿婆仲對人哋搞遊行意見多多。佢質疑有關團體咁大陣仗搞反佔中，又話過往都有民意調查顯示大多數市民反佔中啦，點解今次要咁大費唇舌、咁多動作去搞遊行咁話。如果咁講，都有唔少民意調查話市民支持普選啦，咁泛民使乜成日搞遊行示威、「佔領中環」呢？
講完一大堆歪理，但一被問到收肥佬黎錢一事，佢就左閃右避，仲反問︰「你講一講咩叫收錢先？」不過佢就承認有去信銀行機構，要求佢哋解釋「抽起」肥佬黎壹傳媒集團旗下報紙廣告一事。當被追問究竟「香港2020」嘅經費同肥佬黎有冇關時，佢就唔耐煩話︰「我係答咁多，你點問我都係答咁多，我建議你唔好再問喇！」
收肥佬捐款政黨民望跌
另外，香港研究協會今個月做咗個市民對香港主要政治團體支持度評分嘅調查，發現幾個被揭發收受肥佬黎捐款嘅泛民政黨支持度評分都下跌，跌幅最大嘅係公文袋，而涉接收捐款嘅泛民政黨中，白鴿黨同工黨嘅跌幅就僅次於公文袋，分別排第二同第三。
