流動炸彈通街走 消防官僚發雞盲

唔係亂噏o架。有市民投訴，九龍城德朗邨旁邊近排有架油缸車幾乎每日準時出現，吸引唔少重型車輛嚟入油，每架車唔使兩分鐘就搞掂，現金交易，速戰速決，一個鐘頭十幾架，簡直係生意滔滔，財源廣進。

喂，易燃物品車輛停喺屋邨隔籬，有冇牙煙啲吖？更得人驚嘅係，有啲司機入油嘅時候，居然擔住支煙，若無其事咁，問你怕未。萬一煙頭「辣」着燃油或者其他物件引起火災，油缸車同入油車輛隨時連環大爆炸，萬一波及附近嘅屋邨咯喎，分分鐘死得人多，唔係講笑。

咁明顯嘅安全隱患，消防處睇唔到嘅咩？唔講猶自可，講起把幾火，佢哋話喎，接到轉介之後曾經同海關進行聯合調查，冇發現違法入油活動。咁就奇嘞，附近居民日日都見到，消防官僚就話冇發現，唔知佢哋究竟係發雞盲，定係鬼揞眼。

話明「流動炸彈」，梗係周圍去o架喇，唔通泊定架車等消防處嚟查咩。官僚不負責任，又唔識轉膊，唔怪得消防安全隱患周圍都係喇。

話時話，自從歐盟五期柴油列為零稅率貨品之後，油缸車非法賣油嘅情況愈來愈普遍，「流動炸彈」通街可見。呢嗱，本報曾揭發有貨車改裝嘅「奶媽車」，每日至少兩次由青衣運載柴油經西隧過海，非法運油到港島各區為泥頭車入油。試諗吓，呢啲奶媽車如果喺隧道內發生意外着火，會有咩後果呢？後果就係隨時禍及隧道內其他車輛，變成連環大爆炸。

仲有吖，本報亦曾踢爆部分持合法牌照運載「第五類危險品」嘅運油車，明目張膽將大埔工業邨一個公眾停車場變身「流動油站」，非法為旅巴及商用車輛入油，而附近就係生產氣體嘅廠房，一旦發生意外，後果不堪設想。所以話，官僚靠得住，豬乸會上樹，消防處監管甩漏，沒有最離譜，只有更離譜。

消防安全關乎人命，當局監管失職，如果導致傷亡，等同間接殺人，涉事官員絕對難辭其咎。呢，台灣高雄前排發生氣體大爆炸，超過三百人死傷，經濟部長被迫辭職落台。咪話太一叮唔提醒吖，如果消防官僚繼續不務正業，漠視安全隱患，萬一再爆大鑊搞出人命，就算辭職落台都唔掂吖，叮！