荷里活喜劇巨星羅賓威廉斯（Robin Williams）日前突然逝世，令唔少影迷非常之心痛，包括中大校長沈祖堯。佢尋日發表網誌，懷念呢位天才笑匠，透露自己睇咗羅賓威廉斯主演嘅電影《暴雨驕陽》至少十幾次，而呢套電影教識佢點樣做個好老師。

沈祖堯睇咗《暴雨驕陽》至少十幾次，話呢套電影教識佢點樣做個好老師。（資料圖片）

沈祖堯喺最新網誌話，該齣電影令佢明白真正嘅教育，唔單止要向學生傳授知識、灌輸最新資訊、幫學生通過考試攞高分，或者引導佢哋追求高薪厚職，而係要同學生分享價值觀，幫助佢哋變為成熟、負責任嘅成人。

佢又承認，○三年前一直教學生點樣做個叻嘅醫生，用技巧同知識裝備自己，好少教學生做個尊重生命嘅好醫生。沙士一役改變咗佢嘅價值觀同人生觀，令佢為咗理想放棄部分事業，包括抵擋私人執業嘅誘惑、拒絕外國嘅高薪厚職等，強調對自己嘅選擇一啲都唔後悔喎！

第一手消息請下載on.cc東網iPhone/iPad/Android/Windows Phone Apps