城中鏡：新民黨開P玩Cosplay 歡送葉劉愛女
身兼行政會議及立法會議員嘅葉劉淑儀，佢嘅愛女Cynthia葉榮欣即將要遠赴美國史丹福大學，修讀番佢兩年前已報讀嘅工商管理碩士課程。新民黨為咗歡送佢，搞咗個盛大嘅Cosplay派對。派對上除咗葉劉喺頭上戴咗個大大嘅波點蝴蝶結扮米妮，新民黨前副主席史泰祖史醫生扮牛仔胡迪都入形入格，總裁Marcus余衍深就扮海盜，總之大家都娛人又娛己。
三個人扮乜？好容易認啫，右起史泰祖扮胡迪、葉劉扮米妮同余衍深扮海盜。（被訪者提供）
田北辰（右）扮毛毛，夠晒認真，左為黃卓健。（被訪者提供）
派對主角榮欣（右）扮廚師。
李文龍奪最hea服裝獎
話晒Cynthia都係新民黨黨員，亦曾任該黨策略主任，大家前日就喺中環為Cynthia搞咗個歡送派對，出席呢個派對嘅唯一條件，就係要扮成迪士尼入面嘅人物，所以葉劉就扮做米妮老鼠，史醫生扮做胡迪，該黨副主席田北辰唔怕熱扮「毛毛」，而元朗區議員Legward黃卓健就扮做米奇老鼠。
派對設立了兩個獎項，分別係最佳服裝獎同最hea服裝獎，獲得前者就會有獎勵，獲得最hea服裝獎就要罰着住獨特嘅服裝，喺餐廳附近跑一圈，所以都咪話唔刺激。至於邊個攞到最佳服裝獎？記者就唔知喇，但據聞東區區議員李文龍就攞咗最hea服裝獎囉！
Cynthia話真係好多謝各位黨友為佢搞呢個派對，覺得好surprised（驚喜）、好開心，但同時又好唔捨得，但無論如何，佢會喺美國完成呢兩年課程先，再考慮返香港搵乜嘢類型嘅工作。而史醫生就話好替Cynthia高興，所以佢特意去中環石板街買咗呢套牛仔服裝，襯番派對嘅主題，另外就送咗個迷你投影機畀Cynthia，希望佢日後發表論文時用得到喎！
