尋日，本人去咗「八一七反佔中大遊行」。喂！張融，請唔好count埋我，因我無任何着數收過，我只係好中立的去影低呢個「香港歷史時刻」啫！

呢壇大龍鳳嘅公關程介南站在中環終點台上，不停大叫「今劑大遊行，創造咗香港歷史」，咁又確係嘅！本人可用「人格保證」，尋日嘅遊行過程，是香港「遊行史」中，有從未遇過的新見聞。

一大清早，全港各區地鐵站、火車站、巴士站等站頭，見一個個領班不斷以電話聯繫和等人，亦有一群群穿着紅彤彤制服的公公婆婆應召報到出發，此等情景，喺一九六七年之後，已好耐不曾出現過的了！

除參加遊行示威者的平均年齡是歷年最高外，警察叔叔的表現，也是好多年來未有過咁好的啊！無不斷截龍阻礙示威者前行之餘，還好有禮貌，沒暴躁叱喝，只欠未有扶阿婆過馬路而已！抵讚！

更加抵讚的，應是的士佬大哥，今劑亦無詐型責罵示威人數眾多阻路，累佢哋搵唔到食！

說新見聞，必然要提遊行途中，當示威者行到「反對派」街站時，竟有遊行者掟出「大量雞蛋」，真好奇怪囉！點解會有人遊行前，袋定「大量雞蛋」嘅？

遊行沿途路線的金舖，今次亦無驚見人多示威而拉閘，反而好高興，因不少「自由行者」行行吓順便入去「掃貨」，大家好高興！

吖！講返轉頭先，大會喺維園集合時，請來愛國歌星獻唱，好鬼有「春晚」feel的中國特色，這是香港泛民搞的遊行，不能有的效果！還有，這次遊行，係有水派的，唔似泛民的，要食自己，我講嘅，係沿途好多樽裝水任攞！嗱！泛民營做唔到的，仲要係這日天氣好，有和風，空氣中無乜污染，唔似得泛民的唔係曬死人，就落大雨，都無高人在背後發功！

上述見聞，全屬真話！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android/Windows Phone Apps