政壇：搞搞政：方剛為接班人頭痕
立法會批發及零售界過往係富貴黨嘅天下，九七回歸至今都冇失過手，其中喺○四年開始接周梁淑怡棒嘅方剛，三次參選有兩次大敗對手，上一次喺無對手下自動當選。不過，方剛現年已七十一歲，一六年換屆時更達七十三歲，除咗新界鄉議局主席劉皇發之外，係年紀最大嘅現任議員，加上佢近年身體時有小毛病，據聞佢今屆退意已決，正四出物色合適接班人。
設計圖片及對白
麥瑞琼斬釘截鐵拒絕
近日有消息指方剛搵咗喺業界議題上同佢合作無間嘅零售管理協會主席麥瑞琼接棒，但亦有分析指雖然麥瑞琼喺業內有一定分量，但佢本身只係打工仔，唔似方剛咁做老細，好難說服公司畀佢全職或兼職從政。麥瑞琼就向我哋斬釘截鐵咁話無意參選，形容自己唔係政治人，如果有意參選嘅話，一早喺後生時做咗。
有知情人士更懷疑，有人故意發放麥瑞琼參選呢個假消息，係為咗保護方剛嘅真正接班人。我哋綜合各方消息，發現現年四十四歲、該黨東區區議員、本身從事建材貿易生意嘅邵家輝可能先係「真命天子」。
交邵家輝接棒有危機
消息指出，邵家輝擁有豐富議政經驗，曾於各級選舉為黨友助選「抬轎」，係該黨力捧嘅第二梯隊之一，可惜富貴黨直選表現一向麻麻，佢先遲遲未能上位。問題係佢喺批發及零售界內唔算出名，要順利接棒有一定危機，一旦該黨拍板推薦佢參選，肯定會招來大批挑戰者。邵家輝接受我哋查詢時，對係咪參選不置可否，多次強調須聽從黨嘅決定同安排喎。
