政壇：慢必「出手」 質問麥叔叔
早前麥當勞餐廳被揭發使用上海福喜食品嘅「過期肉」，仲有隱瞞公眾之嫌，雖然佢哋嘅管理層已向公眾道歉，仲將啲存貨交晒出嚟送去堆填區，但係市民仲未息怒。
「慢必」指住麥當勞叔叔，叫佢唔好再「詐傻扮懵」。（互聯網圖片）
繼天文台前台長「黑英」早前喺網誌鬧爆麥當勞用過期肉之外，仲鬧佢哋要由政府相關部門幫手將存貨送去堆填區，花費納稅人嘅錢，反建議餐廳捐番啲錢畀慈善機構。近日離港外遊嘅立法會議員「慢必」陳志全，尋日喺社交網站上載一張佢喺外國麥當勞餐廳門口、手指指質問一個麥當勞叔叔嘅相片，並留言指「福喜事件還未清楚交代，別再詐傻扮懵」。
不過，有好多網民就關注，慢必一面用右手指住麥當勞叔叔，隻左手卻放咗喺麥當勞叔叔兩腿之間嘅敏感部位，笑言慢必隻手「摸咗去邊？」慢必再有留言，問網民香港有邊間麥當勞餐廳有麥當勞叔叔，但係就隻字不提自己隻左手，莫非佢想喺香港再狙擊多麥當勞叔叔多一次？
