政壇：同無家者踢波長毛碌地
喺酷熱天氣下，有啲人寧願留喺屋企歎冷氣都唔想出街，但亦有例外嘅，例如踢友誼波啦。和富社會企業及香港社區組織協會合辦嘅無家者世界盃香港區慈善賽決賽尋日舉行，今次賽事除咗有二十四支隊伍參與，兩名立法會議員「長毛」梁國雄同「單雞」單仲偕亦有落場踢表演賽，期間長毛又踢又攬，一度碌咗落地，然後攤大雙手狀甚無辜，而單雞就話自己平日冇乜點踢，認真老實。
梁國雄踢波時一度碌咗落地，其後攤大雙手狀甚無辜。
何喜華不時返內地踩單車。
和富社會企業會長李宗德同香港社區組織協會主任何喜華尋日都有現身，不過雙雙都冇落到場，其中何喜華自言比較鍾意游水同踩單車，又話同兩、三個朋友夾埋一齊踩單車就容易約得多，相反要湊齊一班人踢波比較難。
何喜華其後提到踩單車嘅話，去內地廣東省一帶就最適合，一來風景靚，二來車又比較少，佢哋通常一踩就踩a足幾日，每日七至八小時，加上平日佢自己嘅探訪工作經常出入舊式唐樓，每棟大廈都要行幾層樓梯，數數手指一日起碼行幾十層，似乎標準身形係咁練成。
