話說全國人大常委會稍後召開會議,外界估計人大常委會喺月底會就政改訂下框架,一旦「落閘」,料佔領中環行動一觸即發。財爺鬍鬚曾喺最新嘅網誌就提到兩名即將重返校園嘅大學實習生,趁此提到自己大學時代見證過多次學生「佔領校長室」,直言理想同現實唔係好簡單對立喎。鬍鬚曾抽水抽到連實習生都唔放過,趁此機會提到「佔領」行為,佢為政改真係可以去到好盡喎!

設計圖片及對白

批二元對立「為拗而拗」

鬍鬚曾最新網誌以「青春無悔」為題,話自己學生時代唔及喺佢辦公室實習嘅兩位同學一樣成績優異,高中時更留咗一頭及肩嘅「Band仔」長髮,大學時就模仿偶像劍手,開始留鬍鬚,部分長輩睇唔過眼,批評為「污糟邋遢、不務正業」。

跟住佢提到自己嘅學生時代,即七十年代初嘅美國,正值反越戰同學生運動高峰,波士頓作為大學城嘅示威同集會係家常便飯,三日一小次,五日一大次。「佔領」抗爭模式當年非新鮮事,當時佢見證過多次學生「佔領校長室」,其中兩年有大規模嘅示威運動幾乎癱瘓學校運作。

鬍鬚曾其後提到,自己年輕時曾相信理想同現實係兩條路抉擇,以為係黑白分明,但其實決意堅持二元對立路線,無論係站喺道德高地,批評另一方放棄原則且惟利是圖,還是堅持現實,指摘對方不切實際,只說不做,其實大部分情況都係「為拗而拗」,毫無意義。因此鬍鬚曾建議年輕人放開懷抱認識世界喎。話時話,鬍鬚曾明示暗示言論都同政改、「佔領」行動有關,睇得出係有的放矢,唔知有心人收唔收到佢嘅訊息呢?

第一手消息請下載on.cc東網iPhone/iPad/Android/Windows Phone Apps