蒲台島變千墓島 香港南極成追憶
提起蒲台島，好多人都知道呢個離島有「香港南極」之稱，風景優美，仲有唔少奇岩怪石，係香港難得一見嘅淨土，亦係遊客尋幽探秘嘅好去處。可惜吖，好花不常開，好景不常在，呢塊淨土可能好快就會消失咯。
係咁嘅，本報兩年前揭發蒲台島一處山頭超過十萬平方呎樹林被夷平，懷疑有人違規，想興建上千個骨灰龕位，搞到成個島滿目瘡痍，烏煙瘴氣。事件曝光後，港府急急補鑊，凍結島上九成土地用途，限制三年內只准作農地。點知依家三年限制期未過，有人又蠢蠢欲動，準備博大霧重新啟動骨灰龕計劃。呢，有關注團體舉報，話蒲台島有重新開工迹象，雜草被剷除，混凝土板上被貼上數字作記號。而食環署亦證實接獲島上兩所龕場通報，疑為正式申請牌照鋪路。
係人都知，由於公營骨灰龕位嚴重不足，導致違規私營龕場遍地開花，當局亡羊補牢，準備立法規管，六月中前經營嘅龕場可向食環署通報，以便日後豁免或領牌。懷疑有人利用呢個灰色地帶向當局通報，企圖繞過城規會將龕場「合法化」。
最奇怪嘅係，地政總署聲稱去過現場視察，冇發現有人經營骨灰龕場；而食環署就話已接到兩所私營龕場提交嘅資料，仲去現場睇過並影埋相添。兩個部門各有各講，一個話有龕場，一個話冇龕場，信邊個好呢？究竟係班官僚鬼揞眼，定係根本冇去現場睇過？有團體擔心，如果政府部門冇足夠溝通，各自為政，一旦發展商成功偷雞獲得龕場牌照，唔止會影響遊客嘅興致，更可能破壞島上風水添。
嗱，唔係杞人憂天o架。香港旅遊景點本來就唔多，好似蒲台島咁嘅天然美景更加係鳳毛麟角，島上擁有大量生態旅遊資源，既係本港最佳觀星地點，亦係僅次於米埔嘅觀鳥勝地，如果淪為千墓島咯喎，咁就真係環保大災難喇。可以見到，好地地一個旅遊勝地，又斬樹木，又灌石屎，搞到好似瘌痢頭咁，就算當局想補救，都冇可能回復以前茂密樹林嘅舊貌；仲有吖，年年到訪此地嘅候鳥，亦可能一去不復返。有形損失，加上無形損失，根本冇辦法計數。
講到底，蒲台島面目全非，都係因為港府失職。如果唔係當局規劃失當，骨灰龕位嚴重不足，又點會有人打蒲台島主意吖？如果唔係當局監管不力，任由發展商胡作非為，蒲台島又點會變成千墓島吖？咪話太一叮唔提醒，如果港產官僚繼續敷衍塞責，互扯貓尾，一旦激起環保人士怒火，隨時爆大鑊o架，叮！
