SUN奇古怪：SUN潮語：【真心嬌】

「真心嬌」嘅意思同另一個潮語「真心膠」大致相同，都係指一啲人真心相信一啲相當荒謬嘅事，又或者指一啲人發自內心地，做出一啲大多數人都唔會做兼且好戇居嘅行為。話人「膠」或「硬膠」其實係粵語粗口「戇X」嘅諧音。可能有人見「真心膠」用到悶，就以「真心嬌」代之，感覺真心得嚟，更天真更傻，你懂的！

記得早輪，有人喺網上話，有部分七一上街遊行嘅市民係收咗錢，所以先至出嚟示威。發表嘅人為咗加強件事嘅可信性，於是成個價目表列晒出嚟，話明遊行幾錢一個人頭，嗌口號又加幾錢舉牌又幾錢……全部明碼實價。以七一大會公布嘅五十幾萬人咁計，如果真係人人收錢遊行嘅話，就算唔使加錢嗌口號舉牌，五百蚊位嚟講，最低消費都要二億。

二億唔係精子數目，係港幣喎！香港地邊個有錢佬肯揼咁多錢出嚟搞民主？呢個世界只有美帝有咁嘅財力物力，去干預別國內政，意圖令香港成為反華基地。依照呢個邏輯，一定係香港民主派勾結外國勢力，先有五十幾萬人出嚟遊行！發表同相信呢啲言論嘅人，當然唔會明白市民上街遊行爭取民主表達訴求係唔會收錢，因為佢哋嘅腦殘得只剩下錢，有啲更會為五毛而出賣良知同靈魂。不過，真係唔排除香港會有啲「真心嬌」相信呢啲係真事，所以嚟緊佢哋上街表示為愛國愛港「反佔中、保普選」，都一定要相金先惠。

其實愛係咪以錢同着數去衡量嘅呢？反佔中運動發起人周融話，派錢及以廉價一日遊利誘別人去遊行都無所謂。講到自己咁愛國愛港，點解又係下下要講錢呢？咁係咪表明喺今時今日嘅香港，愛國就要用錢買嘅呢？恕我「真心嬌」，我嘅愛，我愛嘅城市，幾多錢都唔會賣！