政壇：搞搞政：林新強死喺自己人手上
香港律師會前晚召開特別會員大會，討論對會長林新強（Ambrose）提出不信任動議、收回白皮書言論，同埋要求律師會再就白皮書發聲明，係創會一百零八年來首次獲通過。有知情人士話，律師會只有約九千名會員，前晚足足有近四千人投票，投票率高達四成幾，但結果卻被指屬「意料之外」，剖析「死因」，有人懷疑Ambrose今次係死喺自己人手上，難怪聽聞律師會已經成立委員會，誓要揪出「內鬼」！
設計圖片及對白
有知情人士解釋，今次有好多年輕人出來表態，就算有人幫Ambrose拉票，但班年輕人講到明唔賣帳，因此就知道「冇得玩」。而今次能夠通過三項動議嘅最大原因，最致命嘅唔係班年輕人團結表態，而係有部分以前公開支持過Ambrose嘅人倒戈，有傳佢哋私底下好不滿Ambrose，有啲人更可以喺票源上左右大局。知情人士又話，其實好多律師未詳細睇過白皮書，今次之所以「反林」，主要覺得Ambrose處理事件唔係太好。
律師會理事會頭痛
律師會理事會下星期二就會開會，商討點解決通過不信任會長嘅爛攤子，如果Ambrose唔自行請辭，隨時累死成個理事會。有分析指，論資排輩，會長走人應該係副會長頂上，而兩位副會長熊運信（Stephen）及蘇紹聰（Thomas）之中，又以Stephen資歷深啲。有人形容，Stephen冇政治方面嘅能力，呢類人正正係依家需要嘅，睇嚟呢個燙手山芋，佢都係預咗冇得推搪喇。
